Que é o marketing dixital

Aínda que como comerciante probablemente teñas ben presente iso de que “o cliente sempre ten a razón”, o certo é que, tradicionalmente, no proceso de venda, acostumabase poñer o acento no produto.

Se ofrecías un bo produto ou servizo a un prezo competitivo tiñas moito camiño andado. Se por riba tiñas un bo emprazamento físico ou virtual e un mínimo de prestixio, o éxito estaba garantido… pero agora as cousas xa non son así..

O que era válido na era analóxica non serve na dixital na que, sen restar importancia ao produto, onde realmente está o foco do proceso de compra é no consumidor e nas súas necesidades. Máis que nunca, o cliente debe ser o epicentro do teu negocio.

Non é doado. Os teus produtos e todo o proceso de venda deben xerar unha experiencia nos teus clientes que lle pareza útil, fácil e satisfactoria e que, polo tanto, o conviden a repetir.

Se o acadas, non só terás un bo cliente, senón o mellor embaixador do teu negocio.

Troco de escenario

“Marketing”… e, ademais, dixital! Pensarás “estes quérenme compricar a vida”. Pero non. Chámeslle como lle chames, cada vez que vas vender algo pos en xogo estratexias máis ou menos elaboradas de marketing.

Dunha forma moi simple, o marketing identifica as necesidades dun mercado para satisfacelas con fins de lucro.

O marketing tradicional, é dicir, aquel que se empregaba antes da revolución dixital e a chegada dun novo paradigma de comunicación (xa sabes: internet, redes sociais…), centraba as súas estratexias na venda dun produto a curto prazo, nunha relación efémera co cliente que se reducía ao momento mesmo da venda.

Ademais, os esforzos (en forma de campañas publicitarias, por exemplo) dirixíanse a un mercado moi amplo e canalizábanse a través de medios de masas como a radio, a tele ou a prensa.

Pero chegou internet e o puxo todo do revés e ao marketing puxéronlle o apelido “dixital”.

O marketing dixital tamén busca coñecer e satisfacer as necesidades do cliente, pero tenta así mesmo aproveitar todo o potencial de interacción dos medios ao noso alcance para establecer una relación e comunicación bidireccional con ese cliente. Non só iso. Grazas ao fluxo de información coñecemos mellor a ese público obxectivo ao que nos diriximos.

Así as cousas, diferenciarse da competencia en base ao produto ou ao prezo é cada vez máis difícil.

Fai falla ir un paso máis aló potenciando a experiencia do cliente como elemento diferenciador. 

Emprázoche a seguires moi atento á nosa web para saberes máis sobre a construción da experiencia do cliente.